Diplomatët e lartë amerikanë dhe rusë i përshkruan bisedimet e tyre tetë orëshe në Gjenevë si konstruktive, por thanë se nuk kishte përparime për të kapërcyer dallimet mbi Ukrainën dhe marrëveshjet e sigurisë më gjerësisht në Evropën Lindore.

Delegacionet e udhëhequra nga zëvendëssekretarja amerikane e Shtetit, Wendy Sherman dhe zëvendësministri i Jashtëm rus Sergei Ryabkov u takuan në qytetin zviceran për të trajtuar tensionet në rritje mbi Ukrainën, të shkaktuara nga grumbullimi i dhjetëra mijëra trupave ruse pranë kufirit.

SHBA dhe aleatët e saj kanë kërcënuar me sanksione masive në rast të një pushtimi rus, ndërsa Rusia kërkon garanci që NATO nuk do të zgjerohet më në lindje dhe do të reduktojë trupat dhe armët në Evropë.

Kur Sherman doli nga takimi, ajo i përshkroi ndërveprimet e saj me rusët si “të sinqerta dhe të drejtpërdrejta”.

”SHBA shkuan në takimin e jashtëzakonshëm, të gatshëm për të dëgjuar shqetësimet e sigurisë së Rusisë dhe për të ndarë shqetësimet tona”, deklaroi ajo në një konferencë me gazetarët.

Për shembull, ajo deklaroi se ”SHBA dhe Rusia mund të ringjallën Traktatin INF mbi ndalimin e sistemeve tokësore të armëve bërthamore me rreze të mesme veprimi”, traktat ku SHBA u tërhoq nën presidencën e Donald Trump./