Presidenti i Izraelit, Isaac Herzog i ka përcjellë presidentit palestinez Mahmoud Abbas se ka për qëllim të rifillojë dialogun mes dy palëve.

Abbas ka telefonuar dhe ka uruar Herzog i cili më 7 korrik filloi zyrtarisht detyrën.

Herzog në një deklaratë nga llogaria e tij në Twitter tha: “Bisedova me presidentin e Palestinës, Abbas dhe ashtu sikurse kanë vepruar edhe presidentët e mëparshëm të Izraelit i kam përcjellë atij se kam planifikuar rifillimin dhe vazhdimin e dialogut mes palestinezëve dhe izraelitëve”.

Më tej Herzog vuri në dukje se shpreson që dialogu të ndihmojë për zhvillimin e marrëdhënieve dhe sigurimin e paqes mes dy popujve.

Sipas agjencisë palestineze të lajmeve WAFA, bëhet e ditur se Abbas në bisedën e tij me Herzog ka vënë theksin se është e nevojshme që në Bregun Perëndimor dhe Kuds të sigurohet paqja e përhershme.

Po ashtu Abbas ka theksuar se duhet të ndërmerren hapa praktikë që do të krijojnë kushtet e nevojshme për ndërtimin e paqes gjithëpërfshirëse dhe të drejtë.

Televizioni izraelit Kanal 12 në lajmin e tij të mëparshëm, kishte pretenduar se presidenti palestinez Abbas ka përgatitur një listë me kërkesa për rifillimin e bisedimeve të paqes Palestinë-Izrael.

Bisedimet e paqes mes Palestinës dhe Izraelit u ndërprenë në prill 2014 për shkak se Izraeli nuk pranoi “kufijtë e vitit 1967, të drejtën e për rikthimin e palestinezëve që janë detyruar të migrojnë dhe që t’i japë fund ndërtimit të vendbanimeve të paligjshme hebreje”./AA