Ish kryeministri dhe kreu aktual i PD Sali Berisha reagoi pas rënies në mesditë të sistemit energjitik të vendit. Në një reagim në facebook ai bërë përgjegjës qeverinë e kryeministrit Edi Rama. ” Rama-Balluku rrihnin gjoksin për 1,3 miliard euro investime në këtë sistem, por ky kolaps dëshmon se më së paku 90% e tyre janë vjedhur ndaj dhe kjo renie totale. Dënoj me forcën më të madhe vjedhjen e fondeve të investuara në sistemin energjitik i cili falimentoi me vapen e parë. ” shkruan ndër të tjera zoti Berisha. 

Zëvendëskryeministrja, njëherësh Ministre e Infrastrukturës dhe Energjisë, Belinda Balluku, në një dalje publike tha se energjia u shkëput për shkak të një avarie në linjën e interkoneksionit me Greqinë, që më pas u përhap në të gjithë vendin.  ” Teknikët e OST-së kanë arritur të rikuperojmë të gjithë shpërndarjen e energjisë elektrike përmes linjave të transmetimit në rang vendi brenda 30 minutash, ndërkohë që Tirana është rikuperuar në vetëm 17 minuta”, u shpreh zonja Balluku.

Ndërkaq një ndërprerje masive e energjisë elektrike ka ndodhur të premten në orën 12:30 duke lënë shumë qytete në Bosnjë-Hercegovinë, Mal të Zi dhe Kroacinë jugore, pa energji elektrike.

Disa pjesë të Malit të Zi janë gjithashtu pa energji elektrike si Budva, Bar, Risno, Podgoricë.

Sistemi i Shpërndarjes së Energjisë Elektrike malazeze (CEDIS) ka njoftuar se pothuajse e gjithë zona e Malit të Zi është pa energji elektrike.

Sipas një deklarate të shkurtër në faqen e CEDIS në Facebook, ka shpërthyer një zjarr në një linjë transmetimi në Malin e Zi. 

/ rtsh. al /