Ministrja e Turizmit dhe Mjedisit, Mirela Kumbaro deklaroi se, pavarësisht rritjes së çmimeve në tregun global, sektori i turizmit ka performuar shumë mirë, falë masave të marra nga qeveria.

Duke marrë fjalën të enjten në seancën plenare të Kuvendit, Kumbaro tha se, “6.4 milionë turistë të huaj e vizituan Shqipërinë deri në 30 shtator të këtij viti, duke mos përfshirë këtu vizitorët nga Kosova”.

Sipas saj, 6.4 milionë vizitorë është shifra e regjistruar për vitin 2019, që konsiderohet si viti më i mirë turistik për sa i takon fluksit të turistëve. Por po kaq, vijoi ajo, u regjistruan deri në shtator të këtij viti.

Pavarësisht rritjeve të çmimeve në tregun global, sektori i turizmit ka performuar shumë mirë që nga shitjet në bare e hotele që u rritën me 33.1% në 6-mujorin e parë dhe aktiviteti i agjencive të udhëtimit u rrit me 89.2% krahasuar me të njëjtën periudhë të një viti më parë.

Ndërkohë, referuar dhe të dhënave ndërkombëtare, PBB në vitin 2021, është rritur 17.5% nga të ardhurat e gjeneruara nga turizmi dhe investimet në sektorin e turizmit.

Ajo tha se, në Vlorë gjatë sezonit turistik, numri i të punësuarve shkoi në 27 mijë, ndërsa u aktivizuan 1 mijë subjekte turistike, nga të cilat 280 ishin subjekte të reja. Ndërsa impakti i mbështetjes së qeverisë për këtë sektor u reflektua në lehtësi fiskale ku u aplikua TVSH 6% dhe 5% TVSH për agroturizmin.

Gjithashtu mbrojtja e biznesit të vogël dhe familjeve nga rritja e çmimit të energjisë reflektuan përmirësim të treguesve në sektorin e turizmit në 7-mujorin e vitit 2022.

/ rtsh.al /