Prej disa javësh në pikat e kalimit kufitar mes Shqipërisë dhe Malit të Zi po ushtrohen kontrolle të vazhdueshme nga dogana dhe policia shqiptare ndaj pothuajse të gjjtha automjeteve me targa shqiptare që hyjnë në Shqipëri nga Mali i Zi. 

Sipas tyre qëllimi është frenimi i  kontrabandës së karburantit. 

Çmimi më i ulët se në Shqipëri, veçanërisht i naftes, prej disa muajsh, ka nxitur shumë  banorë të Shkodrës t’i drejtohen Malit të Zi për të mbushur jo vetëm serbatorët e makinave, por edhe bidonë të përmasave të ndryshme. 

Sipas drejtuesve të mjeteve përveç çmimit, ajo që i nxit të bëjnë një gjë të tillë është dhe cilësia e karburantit. 

Shumica e tyre thonë se nuk bëhet fjalë për kontrabandë, por thjeshtë për kursim në këto kohë të vështira krize.

Pas rritjes së çmimit të naftës në bursë, Mali i Zi uli me 50% akcizën duke ndikuar kështu në uljen e çmimit të karburantit.

Aktualisht një litër naftë në Malin e Zi, kushton 25 % më lirë se në Shqipëri.