4 gola shënohen në “Niko Dovana”, por nuk ka fitues përballja direkte mes dy skuadrave që pretendojnë një vend në “Final 4”. Mbyllet në barazim 2-2 ndeshja Teuta-Partizani, që u transmetua drejtpërdrejt në RTSH 2.

Ka qenë e bukur dhe emocionuese sfida e luajtur në Durrës, ku kishte një prani të madhe tifozësh në stadium. Partizani kalon në avantazh me Skukën, por Teuta barazon me Zogos.

Sapo fillon pjesa e dytë, durrsakët kalojnë në avantazh sërish me Zogos që gjen rrugën e rrjetës, por kryeqytetasit kundërpërgjigjen me Bytyçin, që shënon golin e barazimit pak minuta më vonë.

Pavarësisht përpjekjeve nga të dy kampet, asnjë nga skuadrat nuk arrin që të gjejë rrugën e rrjetës në minutat e mbetura.

Mbyllet në barazim 2-2 sfida në “Niko Dovana” me dy skuadrat që ndajnë nga një pikë. Partizani ngjitet në kuotën e 44 pikë dhe ruan në 6 pikë diferencën me Teutën, që tashmë ka 38 pikë në klasifikim.