‘Kun’ Aguero po i afrohet gjithnjë e më shumë daljes në pension për problemet e zemrës. Sipas gazetarit katalanas Gerard Romero, mik i lojtarit argjentinas, sulmuesi i Barçës ka marrë vendimin për t’u larguar nga futbolli dhe do ta shpallë zyrtarisht në një konferencë për shtyp të planifikuar për javën e ardhshme.

Aguero është 33 vjeç dhe ka luajtur që në moshën 15-vjeçare. Që nga debutimi i tij me Independiente kanë kaluar 18 vite, mes Argjentinës, Spanjës dhe Anglisë, por problemet me zemrën u shfaqën vetëm më 30 tetor. Në fund të pjesës së parë Barça-Alaves, lojtari argjentinas, i cili sapo kishte mbërritur në Camp Nou, pasi u lirua nga Manchester City, vuante nga vështirësi në frymëmarrje dhe dhimbje gjoksi, doli jashtë dhe përfundoi në spital.

Ekzaminimet e thelluara fillimisht zbuluan një aritmi, dhe më pas padyshim diçka më serioze. Më 2 nëntor, Barça njoftoi se Aguero do të ndalohej për të paktën 3 muaj. Më pas disa ditë më vonë Catalunya Radio kishte folur tashmë për daljen në pension, gjë që u mohua nga vetë lojtari përmes rrjeteve sociale: “Unë vazhdoj të bëj testime”, tha ‘Kun’, duke lënë një derë të hapur për rikthimin e tij të mundshëm. Sot ky zbulim i ri. Fjala e fundit i takon Agueros, sigurisht,  por realisht duket se karriera e tij e madhe futbollistike duhet të përfundojë këtu.