Tri fshatra në Njësinë Administrative Gorë në bashkinë e Maliqit vijojnë të jenë të bllokuar për qarkullimin e mjeteve, ndërsa me zinxhirë qarkullimi kryhet në 5 fshatra të njësisë administrative Dardhas në Pogradec si dhe në aksin Velçan Bishnicë po në këtë bashki.

 E njëjta situatë është edhe në aksin Shtyllë-Panarit në Vithkuq të Korçës si dhe në fshatrat e Devollit të Sipërm.

Pavarësisht punës së kryer nga punonjësit e bashkive respektive ka qenë e pamundur hapja e rrugëve në Babjen, Dyrbec e Marjan të njësisë administrative Gorë në Maliq, ku jetojnë rreth 50 banorë, pasi terreni është tepër i thyer malor, ndërsa bëhet fjalë për rrugë dheri në të cilat nuk mund të futen borëpastrueset apo fadromat për të pastruar borën.

Në këto kushte e vetmja mundësi lëvizje për banorët është më këmbë apo me kafshë.

E njëjta situatë është edhe në fshatrat Niçë, Dërdushë, Osnat, Lekas, Prenisht në njësinë Dardhas në Pogradec, ku qarkullimi mund të kryhet vetëm me vështirësi me zinxhirë nga mjete të larta.

Të gjitha akset e tjera rrugore nacionale e turistike të qarkut të Korçës janë të qarkullueshme normalisht, ndërsa nuk janë raportuar as probleme me energjinë elektrike.

Gazetare Kostanca Koçi

/rtsh.al