Shfaqja e një sëmundjeje epizootike në Greqi ka shtuar masat parandaluese për mbrojtjen e blegtorisë në vendin tonë.

Shefi i shërbimit veteriner në Shkodër, Mark Preçi, bën me dije se “kjo sëmundje prek kryesisht kafshët dythundrake, si bagëtitë e imëta dhe të trasha, duke sjellë pasoja të rënda në ekonomi nëse përhapet.

Ai thekson se vigjilenca është rritur dhe fermerët janë udhëzuar të raportojnë çdo rast të dyshimtë pranë veterinerëve të zonës.

Ndërkohë, për të frenuar çdo rrezik të mundshëm, është vendosur bllokimi i qarkullimit të kafshëve dhe produkteve me origjinë shtazore nga dhe drejt Greqisë.

Autoritetet po ushtrojnë kontroll të shtuar edhe në pikat kufitare, ndërsa vëmendje e veçantë i është kushtuar monitorimit të lëvizjeve në drejtim të Malit të Zi, që konsiderohet si vend tranzit.

Shërbimi veteriner apelon për bashkëpunim nga fermerët dhe subjektet tregtare, me qëllim mbajtjen nën kontroll të situatës dhe parandalimin e përhapjes së sëmundjes.

/rtsh.al/