Deputetja e Partisë Demokratike dhe anëtare e Komisionit të Rithemelimit të PD, Albana Vokshi, deklaron se ky Komision do kthehet sërish në selinë e PD-së për ta marr atë.

E ftuar në emisonin “Dekalog” të gazetarit Roland Qafoku në RTSH 24, Vokshi tha se më 8 janar nuk e morën dot, por nuk është hequr dorë nga marrja e selisë.

Vokshi për herë të parë bëri publike njohjen me kryetarin e Partisë Demokratike Lulzim Basha dhe mbështetjen që ajo i ka dhënë atij në vitin 2005 duke e bërë pjesë të PD.

Zonja Vokshi, më 8 janar dështuat.

Nuk dështuam. Do kthehemi përsëri.

Ku do ktheheni?

Ky gjak nuk do harrohet. Nuk dështuam më 8 janar. Ne do rikthehemi për ta marrë selinë.

Nuk e merrni dot me dhunë.

Basha dhe Rama janë një. Ai përdori dhunë ndaj protestuesëve në bashkëpunim me policinë. Unë e njoh më mirë se kushdo Lulzim Bashën. E njoh që në vitin 1999 në Kosovë. E kam patur shok të ngushtë.

Domethënë nga ty e kemi Bashën?

Jo nga unë. Edhe unë kam fajet e mia. E kam mbështetur. Në vitin 2005 nuk i hapnin derën e PD. Unë u lutesha aman jepini një zyrë.