Aleanca për Mbrojtjen e Teatrit, së bashku me opozitën, do të ngrihen sërish në protestë këtë të martë (28 maj) para Bashkisë së Tiranës për të kërkuar dorëheqjen e kryebashkiakut Erion Veliaj, në lidhje me dosjen 5D, arrestimin e 3 ish-drejtorëve të kësaj bashkie, si dhe shembjen e Teatrit Kombëtar.

Me qëllim mbarëvajtjen e kësaj proteste, e garantimin e rendit publik, Policia e Shtetit ka marrë masa organizative e operacionale.

Policia ka bërë me dije se nga ora 09:30 e në vijim, do bllokohet përkohësisht qarkullimi i mjeteve në bulevardin kryesor pranë Bashkisë.

“Gjatë disa tubimeve të mëparshme, të zhvilluara nga Aleanca për Mbrojtjen e Teatrit, në sheshin para Bashkisë Tiranë, janë evidentuar raste të përsëritura të kundërshtimit të forcave të policisë, përdorimit dhe hedhjes së molotovëve e sendeve të tjera, në drejtim të Bashkisë Tiranë, duke rrezikuar seriozisht jetën dhe shëndetin e punonjësve të policisë dhe vetë pjesëmarrësve në tubime”, thuhet në njoftim.

Kjo është e disata herë që Aleanca për Mbrojtjen e Teatrit, Rithemelimi e Partia e Lirisë protestojnë para Bashkisë. Kujtojmë se protestat janë shoqëruar me përplasje me policinë, e hedhje molotovësh para derës së institucionit të Bashkisë së Tiranës.

/rtsh.al/