Ambasadori i Rusisë në SHBA, Anatoly Antonov tha se rreziku i një përplasjeje mes SHBA-së dhe Rusisë ishte “i lartë”.

Antonov e krahasoi gjendjen e marrëdhënieve SHBA-Rusi me një “epokë akullnajash” dhe se ishte e vështirë të thuhej se kur mund të rifillonin bisedimet midis dy palëve. 

“Uashingtonit i duhej kohë për të kuptuar kotësinë e politikës së tij ndaj Moskës. Në mënyrë të rreptë, sot është e vështirë të thuhet se kur mund të rifillojë ky dialog, një dialog mbi stabilitetin strategjik. Ne nuk e ngrinim atë, nuk i shpallëm luftë SHBA-së, nuk hodhëm të gjithë makinerinë ushtarako-industriale të NATO-s në territorin ukrainas për të luftuar Federatën Ruse”, tha Antonov

Kremlini akuzoi dje SHBA-në se po lufton kundër Rusisë pasi Uashingtoni rriti mbështetjen ushtarake për Ukrainën dhe priti Presidentin Volodymyr Zelenskiy në Shtëpinë e Bardhë dhe Kongresin. 

Zëdhënësi i Kremlinit, Dmitry Peskov tha se paketa e fundit e mbështetjes së SHBA, e cila përfshin sistemin shumë të kërkuar të mbrojtjes raketore Patriot, “nuk ishte e favorshme për një zgjidhje të shpejtë të luftës”. 

Si pjesë e paketës së mbështetjes së SHBA-së, trupat ukrainase do të mësojnë se si të përdorin sistemet e baterive të raketave tokë-ajër Patriot në Gjermani dhe do të kalojnë disa muaj para se ta vendosin atë në fushën e betejës.

/rtsh.al/