Në vendkalimin kufitar të Tabanovcit, mes Serbisë dhe Maqedonisë së Veriut, Drejtoria maqedonase e Doganave e ka vendosur tabelën e parë për
Korsinë e Gjelbër, në kuadër të iniciativës Ballkani i Hapur. Sipas qeverisë është një nga projektet e para të iniciativës, që jep rezultat konkret dhe të dukshëm për qarkullimin më të shpejtë të mallrave, shërbimeve, njerëzve dhe kapitalit.

”Përfitimi më i rëndësishëm nga Korsia e Gjelbër për kompanitë dhe transportuesit, si dhe për operatorët e autorizuar ekonomikë nga Ballkani i Hapur është zvogëlimi i kohës së pritjes në vendkalimet kufitare. Kjo mundësohet përmes prioritetit në kalim dhe zbatimin e procedurave doganore dhe kontrolle të shkurtuara dhe të lehtësuara fizike dhe të dokumentacionit”, njoftoi qeveria maqedonase.

Me shënimin vizual të Korsisë së Gjelbër për Ballkanin e Hapur, Drejtoria e Doganave i orienton transportuesit drejt lëvizjes më të lehtë të mallrave dhe zvogëlimin e harxhimeve për eksport dhe import.

Javën e ardhshme tabela të tilla do të vendosen edhe në vendkalimin kufitar të Qafë  Thanës dhe pastaj këtë do të bëjnë edhe partnerët nga Serbia dhe Shqipëria.

”Ky është përfitim i rëndësishëm për kompanitë nga të tre vendet, të cilat më shpejt dhe në një mënyrë më efikase mund të qarkullojnë mallrat e tyre”, theksoi qeveria maqedonase.