Bashkimi Evropian, do të financojë me 137.9 milionë euro punimet për linjën hekurudhore që lidh Tiranën me Podgoricën.

Lajmi bëhet i ditur nga Delegacioni i Bashkimit Evropian në Shqipëri.

Ky investim në formë granti nga BE do të nisë në tremujorin e tretë të 2023-shit.

Qeveria shqiptare do të bashkëfinancojë 3.3 milionë euro. 62.9 milionë euro janë hua nga BERZH dhe 62.9 milionë euro janë kredi nga BEI.

Gjithashtu Delegacioni i BE-së përmes një statusi në rrjetet sociale thekson se, pas vizitës në Mal të Zi, Komisioneri i Bashkimit Evropian, për Fqinjësinë dhe Zgjerimin, Oliver Várhelyi udhëtoi drejt Shqipërisë, ku u ndal në pikën kufitare të Hanit të Hotit.

Investimi në linjën hekurudhore Vorë-Hani i Hotit konsiston në rehabilitimin e 120 km linjë hekurudhore dhe rindërtimin e 12 stacioneve .

Gjithashtu ky investim do të ofrojë udhëtim  me shpejtësi deri në 120 km/orë dhe përmirësimin e parametrave të sigurisë.

Nga ky investim do ketë rritje të trafikut hekurudhor ndërkombëtar për mallra dhe njerëz.