Presidenti Bajram Begaj ka pritur në takim ambasadorin e ri të OSBE në Tiranë, Guido De Sanctis ku u vlerësua roli që prezenca e OSBE luan në konsolidimin e shtetit ligjor, organizimin e zgjedhjeve të lira dhe profesionalizmin e medias.

“Prezenca e OSBE-së në Shqipëri është një partner i rëndësishëm dhe bashkëpunues në përballimin e sfidave që lidhen me konsolidimin e shtetit ligjor, organizimin e zgjedhjeve të lira dhe të ndershme, lirinë dhe profesionalizmin e medias, antikorrupsionin dhe shumë fusha të tjera”, tha Begaj.

Presidenti theksoi se OSBE ka ndihmuar në transformimin e shtetit ligjor duke e forcuar atë hap pas hapi.

“Theksova se është shumë e rëndësishme që partitë politike dhe subjektet e tjera konkuruese të demonstrojnë vullnet të qartë për të respektuar ligjin dhe një konkurrencë të ndershme dhe se dialogu politik është i domosdoshëm për të çuar vendin përpara”, shkruan Begaj.

/rtsh.al/