Duke i cilësuar Primarët si një sukses që PD e bëri realitet me premtimin se çdo drejtues do të zgjidhet nga anëtarësia, kreu i PD i zgjedhur nga Rithemelimi Sali Berisha tha se kur PD të vij në pushtet do ta bëj lidh që detyron partitë të votojnë brenda vetes për drejtuesit.

“Një ligj do të përgatitet sa më shpejt, i cili do të detyrojë çdo parti politike, të respektojë normat bazë të demokracisë në jetën e saj. Ky ligj u miratua nga Bundestagu gjerman, pas daljes nga diktatura naziste dhe ky ligj ka detyruar forcat politike të harkut kushtetues të Gjermanisë, në jetën e tyre të brendshme të zbatojnë standardet demokratike. Uroj që anëtarët dhe simpatizantët e PS-së të detyrojnë deputetë e tyre të votojnë këtë ligj, përndryshe i garantoj se ligji i parë që do të votohet pas fitores së PD-së, do të jetë ky ligj dhe se çdo forcë politike që nuk e zbaton atë do të dalë jashtë ligjit, cilado qoftë ajo”, tha Berisha gjatë mbledhjes së kryesisë së Partisë Demokratike në selinë blu.

Në Primare, sipas Berishës, votuan 55 mijë anëtarë, ndërsa u paraqitën 200 kandidatura edhe nga jashtë vendit për të marrë pjesë.

“Primaret ishte një proces i cili zhvillohej për herë të parë me këtë proporcion, transparencë dhe pjesëmarrje, ku PD bëri realitet premtimin e saj se pushtetarët vendorë dhe ata qendror, deputetët do të zgjidhen me votën e anëtarësisë së saj dhe simpatizantëve të saj. Në garë pati mbi 200 kandidatura, në tërësi veprimtarë të shquar dhe të vendosur të PD-së, por në garë morën pjesë edhe veprimtarë të shquar të shoqërisë civile dhe shqiptarët të shquar në emigracion. Në këtë garë, e para me këto standarde në historinë e vendit, votuan për qytetarët e parë të bashkive, rreth 55 mijë anëtarë dhe simpatizantë të PD. Kurrë ndonjëherë në këtë parti kaq vota nuk janë hedhur. Ky votim tejkaloi të paktën me 15 % të gjitha votimet e tjera”, tha Berisha.

/rtsh.al/