Joe Biden ka thyer heshtjen lidhur me ngjarjet e rënda në Minneapolis, duke iu bashkuar ish-presidentëve Barack Obama dhe Bill Clinton në dënimin e ashpër të brutalitetit të treguar nga agjentët e ICE-së (Agjencia e Emigracionit dhe Doganave).

Përmes një deklarate të fortë në platformën “X”, Biden e cilësoi dhunën e ushtruar gjatë muajit të fundit si një shkelje flagrante të parimeve mbi të cilat janë ngritur Shtetet e Bashkuara.

“Ajo që ka ndodhur në Minneapolis gjatë muajit të kaluar tradhton vlerat tona më themelore si amerikanë,” shkruan Biden, duke nënvizuar se Amerika nuk mund të jetë vendi ku shteti kthehet kundër qytetarëve të tij.

Akuzat për torturë dhe shkelje kushtetuese

Reagimi i Bidenit ishte i drejtpërdrejtë dhe prekës, duke dënuar përdorimin e forcës letale dhe shkeljen e të drejtave civile.

“Ne nuk jemi një komb që qëllon qytetarët e tij në rrugë. Ne nuk jemi një komb që lejon që qytetarët e tij të torturohen brutalisht për ushtrimin e të drejtave të tyre kushtetuese,” theksoi ai.

Gjithashtu, Biden akuzoi agjentët për shkelje të Amendamentit të Katërt – i cili mbron qytetarët nga kontrollet dhe sekuestrimet e paligjshme – dhe për krijimin e një klime terrori në lagjet amerikane.

 “Ne nuk tolerojmë terrorizimin e fqinjëve tanë,” përfundoi ai.

/rtsh.al/