Presidenti i SHBA, Joe Biden ka njoftuar një paketë të re ndihme për Ukrainën.

“Unë po shpall një paketë të re të rëndësishme të ndihmës për sigurinë për të ofruar ndihmë në kohë kritike për ushtrinë ukrainase. Falë fondit shtesë për Ukrainën, të miratuar me mbështetjen dërrmuese dypartiake në Kongresin e SHBA-së, Shtetet e Bashkuara do të jenë në gjendje të vazhdojnë t’i ofrojnë Ukrainës më shumë nga armët që ato po përdorin në mënyrë kaq efektive për të zmbrapsur sulmet ruse. Kjo paketë e re do t’i armatosë ata me aftësi të reja dhe armatime të avancuara për të mbrojtur territorin e tyre nga përparimet ruse. Ne do të vazhdojmë të udhëheqim botën në ofrimin e ndihmës historike për të mbështetur luftën e Ukrainës për liri“, tha Biden në një deklaratë.  

SHBA do t’i dërgojë Ukrainës  Sistemet e Raketave të Artilerisë së Lëvizshmërisë së Lartë të prodhuar nga SHBA  si pjesë e paketës së 11-të të ndihmës për sigurinë të Shteteve të Bashkuara në Ukrainë.

Zyrtarët thanë se sistemet që SHBA po i dërgon Ukrainës do të pajisen me municione që do t’i lejojnë Ukrainës të lëshojë raketa rreth 49 milje.

Paketa e re e ndihmës për sigurinë do të përfshijë gjithashtu radarë vëzhgimi ajror, armë shtesë antitank Javelin, armë kundër blindave, helikopterë, automjete taktike dhe pjesë këmbimi për të ndihmuar ukrainasit të vazhdojnë mirëmbajtjen e pajisjeve, thanë zyrtarët.

Megjithatë, Biden u përpoq të shprehte qartë se cilat ishin synimet e SHBA-së në Ukrainë dhe ishte i kujdesshëm të vinte në dukje se SHBA nuk po kërkon luftë me Rusinë.

“Ne nuk kërkojmë një luftë mes NATO-s dhe Rusisë. Sado që nuk jam dakord me Putin dhe i konsideroj veprimet e tij një fyerje, Shtetet e Bashkuara nuk do të përpiqen të sjellin përmbysjen e tij në Moskë“, tha Biden./ CNN

/rtsh.al/