Stuhia tropikale “Idalia” që i është afruar Floridës u shndërrua të martën në uragan, duke shtuar frikën se do ketë pasoja shkatërrimtare në shtetin amerikan.

Sinoptikanët thanë se intensifikimi i fundit do e bëjë “uraganin jashtëzakonisht të rrezikshëm” kur të përplaset në vijën bregdetare perëndimore të shtetit.

Pjesa më e madhe e Floridës, përfshirë zonën shumë të populluar rreth Tampës, është parashikuar që do të preken nga moti me erëra të forta, rrebeshe dhe stuhi vdekjeprurëse.

“Mos e neglizhoni. Mos u qetësoni,” këshilloi kryebashkiaku i Fort Myers Beach.

Rreth 14 milionë banorë të Floridës janë paralajmëruar mbi uraganin, për shkak të itinerarit të pasigurt që po përshkon “Idalia” teksa po vjen e fuqizohet duke lëvizur drejt veriut mbi Gjirin e Meksikës.

“Ka për të qetë një uragan i fuqishëm,” tha guvernatori Ron DeSantis të hënën. “Do e prekë absolutisht shtetin e Floridës në shumë, shumë mënyra.“

Presidenti Joe Biden ka miratuar paraprakisht shpalljen e gjendjes së jashtëzakonshme në shtetin juglindor të SHBA-së.

Guvernatori DeSantis ka thënë se janë mobilizuar më shumë se 1 100 roja kombëtare dhe janë përgatitur 400 mijë litra karburant për t’ua ofruar pikave të karburantit përgjatë rrugëve ku do kryhen evakuimet.

Banorët e zonës po ashtu janë paralajmëruar se do të mbeten pa energji elektrike kur të afrohet uragani. /BBC

/rtsh.al/