Një 16-vjeçar është ndaluar nga Policia në Bulqizë, pasi akuzohet se ka aksidentuar për vdekje një të moshuar. Ngjarja u regjistrua më 28 gusht në fshatin Ostren, por fillimisht u raportua si aksidentale. Në polici u deklarua se 82-vjeçarja ishte rrëzuar në rrugë dhe si pasojë e dëmtimeve të marra kishte ndërruar jetë rrugës për në spitalin e Bulqizës.

Por hetimet treguan se i mituri kishte përplasur me motor të moshuarën dhe më pas ishte larguar nga vendi i ngjarjes. Nën hetim është vënë edhe djali i 82-vjeçares, për shkak se ka patur dijeni se nëna e tij është aksidentuar dhe nuk e ka kallëzuar.

Po ashtu po hetohen edhe dy infermierë pranë Qendrës Shëndetësore të njësisë Administrative Ostren, të dyshuar se kanë kryer veprën penale “Shpërdorimi i detyrës”, pasi nuk kanë raportuar për dëmtimet e konstatuara në trupin e 82-vjeçares.

/rtsh.al/