Erzeni dhe Bylis marshojnë drejt Kategorisë Superiore, ndërsa edhe pas javës së 26-të kryesojnë Kategorinë e Parë dhe fitojnë ndeshjet e tyre. Shijakasit kanë triumfuar në “Tofik Jashari” ndaj Butrintit, 3-1, kjo falë golave të Prengajt në të 1’ dhe në të 10’ e Ymerit në të 32’. Goli i sarandiotëve me Nurjan ishte sa për statistikë. Ndërkohë Bylisi e ka patur më shumë se sa të lehtë transfertën maliqare, teksa ka realizza një fitore me “poker” golash.

Katër golat e kryesuesve të Kategorisë së Parë mbajnë firmat e Qardakut, Loran, Bejit dhe sërisht Qardakut. Mban fort vendin e tretë Korabi, që triumfon ndaj Vorës 2-1. Vetëm një sukses në minutat e fundit për Tomorit ndaj Besës me dygolëshin e Oshafit. Fitore shtëpiake për Tërbunin, Apoloninë e Lushnjen përkatësisht ndaj Besëlidhjes, Pogradecit dhe Burrelit.

Turbina del në pah në Peqin ndaj Shkumbinit me atë fitore 3-2, por që përsëri e sheh skuadrës cërrikase brenda zonës së Play-out. Në tetë ndeshje 23 gola, thuajse me një mesatare prej 3 golash për takim, me faktin që nuk ka asnjë barazim. Kështu Kategoria e Parë mbetet nën dominimin e Bylisit 60 pikë dhe Erzenit 58 pikë.

REZULTATET

Erzeni  – Butrinti                              3-1

Tomori  – Besa                                 2-0

Tërbuni  – Besëlidhja                       1-0

Maliqi – Bylis                                   0-4

Shkumbini – Turbina                       2-3

Apolonia  – Pogradeci                     2-0

Vora – Korabi                                   1-2

Lushnja – Burreli                              2-0