Ka pasur një debat në emisionin ‘3D nga Alban Dudushi’ mes gazetares Gerta Zaimi dhe drejtueses për Marrëdhëniet me Jashtë në PD, Ilda Zhulali, lidhur me rolin e kryeministrit të Kosovës, Albin Kurti, në zgjedhjet presidenciale në Maqedoninë e Veriut.

Sipas Zaimit, Kurti po spikat gjithnjë e më shumë  vetëm si humbës me protagonizmin e tij anti-perëndimor si në Shqipëri ashtu edhe në Maqedoninë e Veriut, por duke marrë si fitore vetëm përçarjen e faktorit shqiptar në Maqedoninë e Veriut.

Ndërsa Zhulali kundërshtoi duke thënë se nuk mund të akuzohet Kurti si anti-perëndimor.

“Aleanca VLEN në Maqedoninë e Veriut, është e lidhur me Kurtin. Albin Kurti e humbi lojën. Në Shqipëri nuk arriti të çajë, dështoi tërësisht. Ai në Maqedoninë e Veriut krijon militantizëm. Ata që e ndjekin janë të verbër. Kurti arriti qëllimin e ndarjes së faktorit shqiptar, kjo ishte fitorja e tij. Ndërsa pasoja ishte se humbi. Mbështet VLEN që kishte dhe tone raciste ndaj pakicave dhe vjen si më djathtë, ndërkohë që Kurti deklaron se është i majtë. Kurti ka ëndërr të jetë lider shqiptar mes shqiptarëve në rajon. Është populist, por ai dështoi në Shqipëri. Do që të bashkojë segmentet nacionaliste dhe si politikan ka frymë anti-perëndimore. Populizmin e ushqen me frymë me anti-perëndimore. Por shumica e shqiptarëve nuk janë anti-perëndimor, ndaj ai dështon”, tha Zaimi.

Por, sipas Zhulalit, të thuash se Kurti është anti- perëndimor “është e egzagjeruar”.

“Anti-perëndimor dhe sovranist janë dy gjëra të ndryshme.”, tha Zhulali.