Sezoni turistik në Durrës pritet të arrijë shpejt kulmin e tij, ndërsa kjo fundjavë shënoi një numër të lartë pushuesish. 
Por në plazhin më të madh të qytetit bregdetar shihen shumë pak kulla vrojtimi apo roje plazhi. Ndonëse pak ditë më parë ministri i turizmit, Blendi Klosi paralajmëroi subjektet e hoteleri-turizmit që të marrin masa për garantimin e jetës së pushuesve në plazhe, pasi në të kundërt do të ketë ndjekje penale, sërish nuk shihet asnjë lëvizje.
Subjektet që aplikojnë për plazhe private e kanë detyrim ndërtimin e kullës vrojtuese dhe punësimin e një vrojtuesi plazhi të certifikuar. 
Aktualisht plazhi i  madh i Durrësit, më i madhi në Shqipëri, në një gjatësi rreth 12 kilometra, frekuentohet nga një numër i konsiderueshëm pushuesish, vendas si dhe atyre që vijnë nga Kosova dhe Maqedonia e Veriut. 
Në fillimin e muajit korrik  pritet të ketë rritje të ndjeshme të pushuesve, pasi muajt korrik e gusht përkojnë më nisjen e pushimeve masive edhe në Shqipëri. Ministri Klosi ka paralajmëruar se çdo humbje jete e pushuesve në plazhe do të shihet edhe si vepër penale e bizneseve akomoduese.