Bullgaria dërgoi të hënën 350 ushtarë në kufirin e saj me Turqinë në mbështetje të policisë, për shkak të presionit në rritje të emigrantëve, njoftoi ministri i Mbrojtjes, Georgy Panajotov.

“Nga sot, në kufirin bullgaro-turk janë dërguar ushtarë për të mbështetur policinë kufitare. Janë dërguar 350 persona me rreth 40 njësi pajisje”, tha ai në një intervistë për televizionin bTV.

Më shumë se 6 500 persona që kanë hyrë ilegalisht, veçanërisht nga Afganistani, janë arrestuar në periudhën janar-shtator në Bullgari, tri herë më shumë se në të njëjtën periudhë të vitit 2020, sipas Ministrisë së Brendshme.

Bullgaria ndodhet në kufirin e jashtëm tokësor të Bashkimit Evropian, një rrugë për ata që duan të mbërrijnë në Evropë.

Parlamenti vendosi në gusht që të dërgonte 400 deri në 700 ushtarë në kufijtë e Bullgarisë me Turqinë dhe Greqinë, për të ndihmuar veçanërisht në ndërtimin e barrierave.