Flamurtari do të ndeshet të shtunën me Burrelin në ndeshjen e parë të Kategorisë së Parë. Trajneri Agostinelli dhe kapiteni Pjeshka thonë se vlonjatët e kanë detyrim fitimin e kampionatit, pa diskutuar asnjë ndeshje dhe kundërshtar.

Flamurtari do të presë të shtunën Burrelin, në ndeshjen e parë të Kampionatit të Kategorisë së parë, e cila do të transmetohet direkt në RTSH Sport, në orën 17.00. Në prag të sezonit të ri, trajneri Andrea Agostinelli thotë se klubi i ka vënë në dispozicion një skuadër të mirë dhe ai e ndjen si detyrim fitimin e kampionatit.

“Ndeshja e parë e kampionatit është gjithmonë e veçantë, sepse nuk njeh mirë as skuadrën tënde dhe as kundërshtarët. Do të jetë ndeshje e rëndësishme, seëse duam ta nisim mirë. Siç e kam thënë që nga dita e parë që jam këtu, kam ardhur sepse Flamurtari duhet ta fitojë këtë kampionat. Nuk e them se më mungon respekti për kundërshtarët, por nuk më pëlqen të luaj për 0-0 dhe meqënëse klubi më ka vënë në dispozicion një skuadër të mirë, e kam për detyrim ta fitoj këtë kampionat”.

Italiani thotë se nuk sheh një repart dominues në skuadër, duke kërkuar futboll sulmues e të ekuilibruar në mbrojtje.

“Skuadrat e forta janë skuadra të ekuilibruara. Janë skuadra që shënojnë gola dhe pësojnë pak. Ndaj nuk ka një repart detyrimisht fitues. Është  gjithë skuadra. Mënyra ime e lojës është futboll proaktiv, sulmues, por me ekuilibrat e duhur në mbrojtje”.

Kapiteni Denis Pjeshka thotë se ndeshjet e para janë delikate, deri sa të arrihet forma e duhur, megjithatë Flamurtari nuk duhet të diskutojë asnjë kundërshtar.

“Gjithmonë ndeshjet e para të kampionatit janë pak delikate, sepse edhe ekipi nuk është në 100% të formës. Vijmë pas fazës përgatitore, pas ngarkesave, megjithatë ne nuk duhet të diskutojmë asnjë ndeshje, asnjë kundërshtar”, ka përfunduar kapiteni i vlonjatëve.