Shtëpia automobilistike “Aston Martin” më 13 Shkurt pritet që të zbulojë veturën e re, e cila do të ngitet nga Fernando Alonso dhe Lance Stroll.

Në një intervistë të publikuar në portalin e shoqërisë, drejtori teknik, Eric Blandin ka zbuluar se mjeti i ri do të jetë kompetitiv dhe shumë ndryshe nga i vitit të kaluar.

“Kemi implementuar disa inovacione të zgjuara në veturë, ato janë si qershia mbi tortë. Kemi gjetur disa hapësira në rregullore dhe kemi përmirësuar së tepërmi projektin. Kur niset një projekt i ri pengesa më e madhe qëndron te makina e një sezoni më parë dhe ne me këto hapësira që kemi gjetur në rregullore kemi mundur të evitojmë këtë pengesë”, tha ish-shefi i aerodinamikës i Mercedes-it.

(Eric Blandin)

Mes të tjerash Eric Blandin pohoi se modeli i ri i Aston Martin i quajtur “AMR23” do të ketë ndryshime rrënjësore: “Kemi ndryshuar 90% të pjesëve të veturës krahasuar me një vit më parë dhe rreth 95% të anës aerodinamike”.