Autoritetet në Letoni u bënë thirrje banorëve për t’i kthyer bodrumet në strehimore për sulme ajrore. Ky udhëzim i autoriteteve është tregues se vendi baltik i trembet faktit që mund të jetë objektivi i ardhshëm i Rusisë.

Ish-republika sovjetike, tani anëtare e NATO-s dhe Bashkimit Evropian, ndan një kufi 214 km me Rusinë dhe ka qenë një nga mbështetësit më të besueshëm të Ukrainës që nga pushtimi i Rusisë.

“I bëjmë thirrje të gjithëve të sigurohen që bodrumet të mund të përdoren si strehë në rast emergjencash”, tha kryebashkiaku i Rigas, Vilnis Kirsis.

Kryebahskiaku shtoi se edhe punonjësit e bashkisë do të bëjnë të njëjtën gjë për objektet që i përkasin qytetit.

Gints Reinsons, kreu i një komisioni të mbrojtjes civile të Rigës, tha se “bodrumet e ndërtesave publike, shkollave, shtëpive të të moshuarve, spitaleve dhe bashkive do të inspektohen nga autoritetet të cilat do t’i përgatisin ato për të shërbyer si vende fshehjeje në rast të një sulm.”

Në mars, kryeministrja letoneze Evika Silina e krahasoi Rusinë me “një të dehur të paparashikueshëm”.

“Ne jetojmë pranë një fqinji, i cili, le të themi, është si një i varur nga alkooli ose droga, veprimet e të cilit nuk mund t’i parashikojmë,” tha ajo.

/rtsh.al/