Një sasi droge prej 7 kilogramë e 300 gramë është zbuluar në Portin e Durrësit mbrëmjen e së premtes (24 maj), ndërsa dy persona kanë rënë në pranga.

Bëhet me dije se droga është zbuluar në një furgon me targa angleze, ndërsa u kap në momentin që po kalonte pikën e kalimit kufitar drejt Italisë.

Sasia e lëndës narkotike ishte fshehur në pjesën e poshtme të sediljes së furgonit, në një vend të fshehtë të krijuar për këtë qëllim, ndërsa ishte ndarë në 7 pako. Personat e arrestuar janë identifikuar si Arjan Doçi 38 vjeç, shoferi i furgonit dhe Mentor Çuni 39 vjeç, pronari i furgonit.

Në cilësinë e provës materiale u sekuestruan 7 kilogramë e 300 gramë lëndë narkotike kokainë, 4 celularë, fugoni, 3950 euro, 21 700 lekë, 150 korona suedeze dhe 60 franga.

Materialet procedurale i kaluan Prokurorisë pranë Gjykatës së Rrethit Gjyqësor Durrës, për veprime të mëtejshme, për veprën penale “Trafikimi i lëndëve narkotike”, kryer në bashkëpunim.

/rtsh.al/