Sekretari për Çështjet Ligjore në PD, Ivi Kaso, ka reaguar në emër të Partisë Demokratike, lidhur me vendimin e Gjykatës së Lartë, e cila nuk pranoi kërkesën për pezullimin e vendimit për dënimin e Ervin Salianjit.

Sipas tij, PD e konsideron si vendimin si ri dënim ndaj ish- deputetit demokrat Ervin Salianji, vendim i cili sipas tij, “është marrë në presionin dhe urdhrat e Edi Ramës.”

“Kundër një vendimi të paligjshëm dhe politikisht të motivuar, trupa e Gjykatës së Lartë, as u ngrit në lartësinë e detyrës dhe as nuk i shërbeu balancave ndërmjet pushteve në Shqipëri të cilat i ka fshirë Edi Rama me një të rënë të lapsit.”, tha Kaso.

Sipas tij, mbajtja në burg e nënkryetarit të grupit parlamentar demokrat është një medalje për të dhe opozitarët, dhe një njollë turpi për qeverinë dhe gjykatat e saj, të cilat e kanë kthyer përndjekjen e eksponentëve të opozitës në gjueti shtrigash.

“Partia Demokratike shpreh edhe njëherë mbështetjen për deputetin e saj dhe për çdo zë opozitar që ngrihet kundër regjimit. PD thekson se nuk ka paqe pa lirimin e të gjithë opozitarëve të mbajtur padrejtësisht në izolim ose në qeli.
Shërbëtorët e Edi Ramës dhe Fatmir Xhafajt në gjyqësor nuk mund ta heshtin opozitën dhe as ta detyrojnë atë që, ashtu si ata, të shndërrohet në aneks të pushtetit.”, deklaroi Kaso.

/rtsh.al/