Në frymën e muajit të shenjtë të Ramazanit, Ambasadori i Bashkimit Evropian në Shqipëri, Silvio Gonzato, ka zhvilluar një takim zyrtar me Kryetarin e Komunitetit Mysliman të Shqipërisë (KMSH), Myftiun e Përgjithshëm Bujar Spahiu. Vizita shërbeu për të theksuar rëndësinë e bashkëjetesës fetare në vend dhe kontributin e institucioneve të besimit në aspiratat integruese të Shqipërisë.

Gjatë bisedës, diplomati evropian vlerësoi lart rolin thelbësor që Komuniteti Mysliman luan në ruajtjen dhe promovimin e dialogut ndërfetar.

Ambasadori Gonzato shfrytëzoi këtë takim për të ritheksuar qëndrimin e palëkundur të Bashkimit Evropian në mbrojtje të lirisë së fesë dhe besimit për çdo individ. Sipas tij, këto të drejta nuk janë thjesht koncepte abstrakte, por pjesë thelbësore e përkushtimit të BE-së ndaj të drejtave të njeriut dhe mbrojtjes së dinjitetit njerëzor.

Ai theksoi se këto vlera të mbrojtura me ligj dhe karta ndërkombëtare në Evropë, gjejnë një pasqyrim të natyrshëm në traditën e gjatë shqiptare të respektit reciprok mes komuniteteve të ndryshme fetare.

Mbështetja për procesin e integrimit

Një pikë e rëndësishme e takimit ishte edhe qasja e unifikuar e komuniteteve fetare pro integrimit të vendit. Përmes një mesazhi publik të shpërndarë pas takimit, Ambasadori shprehu mirënjohjen e tij të thellë:

“Faleminderit Myftiu i Përgjithshëm Bujar Spahiu, që më takuat gjatë muajit të shenjtë të Ramazanit. Jam mirënjohës për mbështetjen që i jepni procesit të integrimit të Shqipërisë në Bashkimin Evropian dhe për rolin e rëndësishëm që komuniteti musliman luan në ruajtjen e dialogut ndërfetar. Bashkimi Evropian promovon dhe mbron lirinë e fesë ose të besimit për çdo individ, pasi kjo është pjesë thelbësore e përkushtimit tonë ndaj të drejtave të njeriut dhe dinjitetit njerëzor, vlera që pasqyrohen edhe në traditën e gjatë të bashkëjetesës fetare në Shqipëri.”

Ky takim rikonfirmon vëmendjen e delegacionit të BE-së ndaj të gjithë aktorëve shoqërorë në Shqipëri, duke njohur peshën e liderëve shpirtërorë në ruajtjen e stabilitetit dhe orientimit pro-perëndimor të shoqërisë shqiptare.

/rtsh.al/