Një përplasje e armatosur në brigjet veriore të Kubës mes një motoskafi të dyshuar se vinte nga Florida dhe forcave ushtarake kubaneze ka lënë pas katër të vrarë dhe gjashtë të plagosur. Incidenti, i cili ndodhi të mërkurën, po trajtohet nga Havana zyrtare si një akt terrorizmi dhe tentativë për infiltrim, duke rritur më tej tensionet tashmë të ndezura diplomatike mes dy vendeve.

Sipas Ministrisë së Brendshme të Kubës, një motoskaf i regjistruar në Florida, SHBA, me 10 persona në bord, i është afruar bregut verior të ishullit. Autoritetet kubaneze raportojnë se pasagjerët hapën zjarr të parët ndaj ushtarëve që u afruan për t’i kontrolluar. Forcat kubaneze iu kundërpërgjigjën zjarrit, duke neutralizuar katër persona dhe duke arrestuar gjashtë të tjerët.

Gjatë kontrollit të mjetit lundrues, zyrtarët kubanezë deklaruan se gjetën një arsenal të mirëfilltë ushtarak, i cili përfshinte: pushkë sulmi dhe pistoleta, eksplozivë të prodhuar në kushte shtëpiake, jelekë antiplumb dhe uniforma kamuflazhi, dylbi me pamje teleskopike.

Të përfshirët në incident

Qeveria kubaneze i ka identifikuar personat në bord si shtetas kubanezë që jetonin në Shtetet e Bashkuara të Amerikës. Deri më tani, janë bërë publikë emrat e shtatë prej tyre, ku disa rezultojnë me precedentë të mëparshëm ose në kërkim nga Havana: Amijail Sánchez González, në kërkim për planifikim dhe financim të terrorizmit; Leordan Enrique Cruz Gómez, në kërkim për përfshirje në akte terroriste; Conrado Galindo SariolIsh, i burgosur politik (sipas mediave opozitare kubaneze); Michel Ortega CasanovaI vrarë gjatë shkëmbimit të zjarrit; jetonte në SHBA prej 20 vitesh. Të tjerë të arrestuar janw José Manuel R. Castelló, Cristian Ernesto A. Guevara, Roberto Azcorra Consuegra.

Reagimet zyrtare

Ky incident ka provokuar reagime të menjëhershme nga të dyja anët e ngushticës së Floridës. Presidenti kubanez Miguel Díaz-Canel dhe Ministri i Jashtëm Bruno Rodríguez theksuan se mbrojtja e sovranitetit është e panegociueshme, duke paralajmëruar se ishulli do të mbrohet kundër çdo agresioni mercenar.

“Kuba nuk sulmon dhe as nuk kërcënon. Mbrojtja e brigjeve të Kubës, territorit kombëtar dhe sigurisë kombëtare është një detyrë e pashmangshme,” theksoi qeveria kubaneze.

Në Uashington, Sekretari i Shtetit Marco Rubio mohoi kategorikisht çdo përfshirje të qeverisë amerikane në këtë operacion. Ndërkohë, Zyra e Prokurorit të SHBA-së për Distriktin Jugor të Floridës ka nisur një hetim të pavarur për të zbardhur rrethanat, duke mbledhur informacione nëse të përfshirët ishin qytetarë apo banorë të përhershëm të SHBA-së.

Konteksti gjeopolitik dhe rëndimi i krizës

Kjo përplasje e armatosur nuk është e izoluar, por vjen në një moment kritik për ishullin. Kuba po përballet me një krizë të paprecedentë energjetike dhe ekonomike, e rënduar ndjeshëm pas masave të reja shtrënguese nga administrata e Presidentit Donald Trump. Urdhri ekzekutiv i 29 janarit për vendosjen e tarifave ndaj vendeve që furnizojnë Kubën me naftë, si dhe ndalimi i dërgesave pas zhvillimeve në Venezuelë në fillim të janarit, e kanë çuar vendin drejt një “bllokade energjetike”.

Ndonëse Thesari i SHBA-së së fundmi ka lejuar disa lehtësime humanitare për importin e naftës vetëm për sektorin privat, incidenti i fundit i armatosur kërcënon t’i kthejë marrëdhëniet diplomatike në pikën e tyre më të ulët.

/rtsh.al/