Banorët e Himarës do i drejtohen kutive të votimit të dielën, për të zgjedhur kryetarin e tyre mes kandidatëve Vangjel Tavo dhe Petro Gjikuria.

Në bashkinë jugore janë rreth 23 mijë qytetarë me të drejtë vote.

Një ditë më parë Komisioni Qendror Zgjedhor mundësoi mbërritjen e materialeve zgjedhore. Votimi do të kryhet nëpërmjet identifikimit elektronik të zgjedhësve, ndaj për këtë proces janë dërguar edhe pajisjet përkatëse me kamerat monitoruese.

Zëvendëskryetarja e KZAZ-së nr. 88, Irina Bejdo, deklaroi të shtunën për RTSH se deri tani procesi ka qenë i rregullt dhe përgatitjet për orën 15:00, kur do të kryhet shpërndarja, janë drejt fundit.

Qendrat e votimit më të largëta në bashkinë e Himarës janë ato të Horë-Vranishtit. Fshati Tërbaç, rreth 60 minuta larg KZAZ-së, po bën gati edhe monitorët e numërimit në 4 tavolina.

36 qendrat e votimit nesër do të hapen në orën 07:00 dhe do të mbyllen në 19:00.

/rtsh.al/