Instituti Ndërkombëtar për Sigurinë me qendër në Beograd i ka bërë thirrje përmes një letre Asamblesë Parlamentare të NATO-s që të mos e miratojë statusin e Kosovës si një anëtare e asociuar e organizatës në seancën që pritet të mbahet të premten.

Në këtë letër, sipas shtypit serb, pretendohet se dhënia e statusit për Kosovën do të ishte një vendim i dëmshëm.

“Si një organizatë eksperte që përfaqëson dhe promovon integrimin euroatlantik dhe vlerat e tij për dy dekada, duke përfshirë anëtarësimin e vendeve të Ballkanit Perëndimor në NATO, Instituti Ndërkombëtar i Sigurisë beson se dhënia e statusit të një anëtari të asociuar për Kosovën do të ishte i dëmshëm si për Asamblenë Parlamentare të NATO-s dhe veçanërisht për proceset e stabilizimit dhe integrimit euroatlantik në Ballkanin Perëndimor”, thuhet në letër, sipas agjencisë së lajmeve Beta.

Aplikimi i Republikës së Kosovës për të qenë anëtare e asociuar në Asamblenë Parlamentare të NATO-s do të jetë në agjendën e takimit që ky institucion do të mbajë nga data 25 deri më 27 maj në Sofje të Bullgarisë.

Kosova humbi së fundi mundësinë për t’u bërë anëtare e Këshillit të Evropës. Anëtarësimi dukej një çështje e kryer deri në momentin kur u shfaq papritur kushti i krijimit më parë të Asociacionit të komunave me shumicë serbe.

/rtsh.al/