Senati i Irlandës ka miratuar së fundmi një rezolutë që njeh pushtimin rus të Ukrainës si gjenocid. Presidenti i Ukrainës Volodymyr Zelensky ka shprehur falënderime për këtë akt, po ashtu edhe për pranimin e refugjatëve ukrainas nga ana e Irlandës.

Në një konferencë të përbashkët shtypi me presidentin ukrainas,  kryeministrin irlandez Micheál Martin tha se Ukraina i përket Bashkimit Evropian dhe se Irlanda do të jetë me të në çdo hap të rrugës.

“Lufta brutale e Rusisë kundër këtij vendi të bukur demokratik është një shkelje e rëndë e ligjit ndërkombëtar. Është një fyerje për gjithçka që përfaqëson Irlanda. Nuk mund dhe nuk do të lejohet të qëndrojë,” tha Martin.

Lidhur me pritjen e refugjatëve Martin tha se “janë të mirëpritur të qëndrojnë në Irlandë për aq kohë sa u nevojitet. Shtëpia jonë është shtëpia juaj.”

Irlanda mirëpriti 40,000 ukrainas që ikën nga lufta në Ukrainë si pasojë e pushtimit rus.

/rtsh.al/