Ish-emiri i Katarit, i cili e revolucionarizoi Katarin nga prejardhja e tij beduine në një fuqi të fuqishme rajonale, ka ndërruar jetë në moshën 74 vjeçare. Lajmi u bë me dije nga Amiri Diwan i vendit, organi më i lartë qeveritar i vendit. Sheiku Hamad bin Khalifa Al Thani sundoi Katarin nga viti 1995 deri në vitin 2013, përpara se të abdikonte nga froni te djali i tij, Sheikh Tamim, udhëheqësi aktual i vendit të pasur me gaz të Gjirit.

“Divani i Amirit njoftoi vdekjen e Shkëlqesisë së Tij, Babait Amir Sheikh Hamad bin Khalifa Al-Thani, të dielën në mëngjes. Allahu e mëshiroftë shpirtin e tij dhe i dhëntë shpërblimin më të mirë për atë që ka arritur për atdheun dhe kombin e tij”, tha Divani.

Në njoftimin zyrtar thuhet se ish-udhëheqësi i vendit u nda nga jeta në orët e mëngjesit, ndërsa familja mbretërore dhe autoritetet e Katarit shprehën nderimet për figurën e tij dhe kontributin në zhvillimin e shtetit. Sheikh Hamad drejtoi Katarin për 18 vite, nga viti 1995 deri në vitin 2013, periudhë gjatë së cilës vendi pësoi një transformim të jashtëzakonshëm ekonomik, politik dhe ndërkombëtar.

Gjatë qeverisjes së tij, Katari u shndërrua nga një shtet i vogël i Gjirit me tradita beduine në një fuqi rajonale me ndikim global, falë pasurive të mëdha energjetike, investimeve ndërkombëtare dhe rolit aktiv në diplomacinë e Lindjes së Mesme. Një prej trashëgimive më të mëdha të Sheikh Hamad është ngritja e rrjetit mediatik Al Jazeera, i cili e ktheu Katarin në një aktor të rëndësishëm në peizazhin ndërkombëtar të medias. Gjatë mandatit të tij, vendi siguroi gjithashtu të drejtën për të organizuar Kupën e Botës FIFA 2022, një nga projektet më të mëdha të historisë së Katarit.

Në vitin 2013, Sheikh Hamad u largua vullnetarisht nga pushteti dhe ia dorëzoi drejtimin e vendit djalit të tij, Sheikh Tamim bin Hamad Al Thani. Abdikimi i tij u konsiderua një nga tranzicionet më të rralla dhe më të qeta të pushtetit në mesin e monarkive të Gjirit. Sheikh Hamad kishte marrë pushtetin në vitin 1995, pas një ndryshimi të udhëheqjes brenda familjes sunduese të Katarit, kur rrëzoi babain e tij në një transferim pushteti pa gjakderdhje. Nën drejtimin e tij, Katari u konsolidua si eksportuesi më i madh në botë i gazit natyror të lëngshëm dhe si një qendër e rëndësishme financiare, investimesh dhe diplomatike në rajon.

/rtsh.al/