Eksperti për çështjet ndërkombëtare, Geron Kamberi ka deklaruar në emisionin “3D” të Alban Dudushit se bota po dridhet për shkak të fuqisë së Kinës.

Kamberi tha se ajo që po i shqetëson shumë Perëndimin është fuqizimi ekonomik i Kinës, i cili lidhet ngushtë me elementë të tjerë të fuqisë shtetërore.

“Është ringritja e Kinës ose, më saktë, fuqizimi ekonomik i Kinës, i cili ka të bëjë pastaj edhe me disa elementë të tjerë të fuqisë. Në teorinë e marrëdhënieve ndërkombëtare janë tre elementë që përcaktojnë fuqinë e një shteti për të luajtur rol në politikën ndërkombëtare: demografia, ekonomia dhe ushtria, plus gjeografia në momente të caktuara. Kur këto elementë bashkohen, pesha dhe roli i një vendi në marrëdhëniet ndërkombëtare bëhet i padiskutueshëm,” tha Kamberi.

Ai theksoi se në rastin e Kinës, dy elementët kryesorë – një popullsi shumë e madhe dhe një ekonomi e fuqishme – e bëjnë atë një faktor vendimtar në politikën botërore.

Duke iu referuar librit “Shekulli kinez” të gazetarit italian Federico Rampini (ish-korrespondent i “La Repubblica” në Pekin), Kamberi kujtoi se Kina ka shfrytëzuar në maksimum mundësitë historike që i janë dhënë, si anëtarësimi në Organizatën Botërore të Tregtisë në 2001, vizita e Niksonit në 1972 dhe reformat e mëvonshme.

“Perëndimi po i afronte Kinës mundësi në kushte krejtësisht të tjera, në atë që u quajt ‘diplomacia trekëndore’ e Kissingerit. Tani jemi në momentin kur Perëndimi, Shtetet e Bashkuara por edhe Europa, kanë parë që Kina po rritet gradualisht. Siç thotë ajo shprehje, ajo është bërë ‘elefanti në dhomë’,” u shpreh eksperti.

Kamberi përmendi edhe thënien e Napoleon Bonapartit me të cilën hapet libri i Rampinit: “Kur Kina të zgjohet, bota do të dridhet”.

“Megjithatë, Kina investon jashtëzakonisht shumë në ushtri, sepse është e vetëdijshme për peshën dhe ndikimin që do të ketë në rajonin e Indo-Paqësorit. Në këtë rajon ka fuqi të tjera si India, Japonia, Australia etj., të cilat e shohin rritjen e Kinës pa ndonjë entuziazëm të madh,” shtoi ai.

Sipas Kamberit, sistemi aktual i marrëdhënieve ndërkombëtare i mbështetur te vlerat, të drejtat e njeriut dhe bashkëpunimi shumëpalësh po vihet në provë të rëndë për shkak të ndryshimeve gjeopolitike dhe efekteve të globalizmit, ku Kina ka dalë si fituesi më i madh.

/rtsh.al/