Këshilli i Emërimeve në Drejtësi (KED) ka vendosur zyrtarisht ndalimin e kandidimit të Alaudin Malajt për postin e gjyqtarit në Gjykatën Kushtetuese. Vendimi lidhet me vendin vakant të shpallur nga Institucioni i Presidentit të Republikës më datë 31 tetor 2025.

Vendimi u mor gjatë mbledhjes së radhës të zhvilluar të mërkurën, më 15 prill 2026. Sipas procedurës, Këshilli u mblodh në përbërje të plotë të anëtarëve të tij, si dhe me praninë e përfaqësuesve të ftuar.

Skualifikimi i kandidatit erdhi pasi trupa dëgjoi dhe shqyrtoi relacionet e përgatitura nga relatorët përkatës, të cilët kanë vlerësuar dosjet e kandidatëve aplikantë për këtë vakancë.

Mbledhja dhe vendimmarrja e KED është bazuar në pikën 2, të nenit 233 të ligjit nr. 115/2016, “Për organet e qeverisjes së sistemit të drejtësisë”. Në njoftimin zyrtar nuk jepen detaje të mëtejshme mbi argumentet specifike që çuan në ndalimin e kandidimit të Malajt.

/rtsh.al/