Departamenti i Drejtësisë ka bërë të ditur se ish-presidenti Donald Trump është në objektivin e hetimit federal për keqpërdorimin e dokumenteve të klasifikuara.

Vendimi i prokurorëve për të informuar Trump ka të bëjë me veprimet e ish-presidentit dhe në veprimet e njerëzve përreth tij.

Ekipi ligjor i Trump u takua me zyrtarë të Departamentit të Drejtësisë. Rregulloret e Departamentit të Drejtësisë lejojnë që prokurorët të njoftojnë subjektet se janë objektiv i një hetimi.

Hetimi i prokurorit special ka shqyrtuar trajtimin e dokumenteve të klasifikuara nga Trump që ai solli me vete në resortin e tij në Mar-a-Lago pasi u largua nga Shtëpia e Bardhë, duke përfshirë veprimet që u ndërmorën pasi Trump mori një fletëthirrje në maj 2022 për të kthyer të gjitha materialet e klasifikuara në zotërim të tij.

Gushtin e kaluar, agjentët e FBI-së morën më shumë se 100 dokumente të klasifikuara nga Mar-a-Lago.

Prokurorët kanë marrë në pyetje dhjetëra dëshmitarë gjatë disa muajve të fundit, duke përfshirë ndihmës të lartë të Trump dhe punonjës në resortin e tij në Florida.

Shumica e dëshmitarëve janë paraqitur para një jurie të madhe në Uashington, DC, por javët e fundit një juri e madhe federale në Florida ka dëgjuar dëshmi nga shumë dëshmitarë.

Ish-shefi i stafit të Shtëpisë së Bardhë, Mark Meadows ka dëshmuar para një jurie të madhe federale si pjesë e hetimeve të vazhdueshme të Smith për trajtimin e dokumenteve të klasifikuara nga ish-presidenti, si dhe përpjekjet për të përmbysur zgjedhjet e vitit 2020.

I pyetur në lidhje me informimin e Trump se ai është një objekt i këtiij hetimi, ish-zëvendëspresidenti Mike Pence tha se nuk dëshiron ta shohë Trumpin të paditur, transmeton CNN. 

“Ky lloj veprimi nga Departamenti i Drejtësisë, mendoj se vetëm do të nxiste ndarje të mëtejshme në vend” i tha Pence Dana Bash në një bashki të CNN në Des Moines, Iowa.

/rtsh.al/