Njëqind civilë janë ende të bllokuar në fabrikën e çelikut në Mariupol. Sipas këshilltarit të kryetarit të bashkisë së Mariupolit , Petro Andryushchenko, pavarësisht faktit se në fabrikë ka civilë, sërish kjo nuk i ka zvogëluar sulmet e Rusisë.

Prej javësh, fabrika e çelikut është bërë bastioni i fundit i rezistencës ukrainase në Mariupol, një qytet në jug të Ukrainës, i cili që nga fillimi i konfliktit ka qenë një nga objektivat kryesore të ushtrisë së Vladimir Putinit.

Luftëtarët e fundit të mbetur janë vendosur në këto tunele, 24 kilometra të gjatë, në zonën e fabrikës së çelikut Azovstal.

CNN shkruan se fabrika ka qenë jashtë përdorimit që nga 19 marsi, por nëntoka, e gërmuar në kohët sovjetike, është bërë një strehë, si për civilët ashtu edhe për ushtarët ukrainas. Javët e fundit disa herë janë bërë përpjekje për evakuimin e civilëve, por ende nuk është arritur largimi i të gjithëve./ rtsh.al