Presidenti i Kolumbisë, Gustavo Petro, ka paralajmëruar se ekziston një “kërcënim real” nga një veprim ushtarak i mundshëm i Shteteve të Bashkuara kundër vendit të tij. Petro tha se SHBA-të po e trajtojnë Kolumbinë dhe kombet e tjera si pjesë të një “perandorie amerikane”, duke kritikuar retorikën dhe veprimet e Uashingtonit në rajon.

Deklaratat e presidentit kolumbian vijnë pas komentit të ish-presidentit amerikan Donald Trump, i cili sugjeroi se një operacion ushtarak që synon Kolumbinë “tingëllon mirë”. Petro e dënoi ashpër këtë qëndrim dhe paralajmëroi se një përshkallëzim i këtij lloji do të rrezikonte transformimin e SHBA-së nga një fuqi globale në një vend të “izoluar nga bota”.

“Në vend të Shteteve të Bashkuara që dominojnë botën,  një ëndërr imperiale, këto janë Shtetet e Bashkuara të izoluara nga bota. Një perandori nuk u ndërtua duke qenë e izoluar nga bota”, tha ai.

Ai akuzoi gjithashtu agjentët e Shërbimit Amerikan të Imigracionit dhe Doganave (ICE) si “brigada naziste” dhe vuri në dukje se për dekada, SHBA-të kanë trajtuar vendet e Amerikës Latine si pjesë të një perandorie, duke shkelur ligjin ndërkombëtar.

Tensionet mes dy vendeve janë rritur edhe pas operacioneve të SHBA-së kundër Venezuelës dhe komentet e ashpra të Trump ndaj qeverisë kolumbiane. Petro paralajmëroi se Kolumbia do të qëndrojë e vendosur për mbrojtjen e sovranitetit dhe pavarësisë së saj.

/rtsh.al/