Në Paris u zhvillua sot Konferenca e Aleancës së Vullnetit, ku u diskutua draft-komunikata që parashikon klauzola detyruese në garancitë e sigurisë për Ukrainën.

Dokumenti synon të forcojë mbështetjen ndërkombëtare për Kievin në rast të një sulmi të armatosur nga Rusia, duke u fokusuar tek rivendosja e paqes dhe stabilitetit.

Sipas draftit të parë, angazhimet e vendeve pjesëmarrëse mund të përfshijnë përdorimin e kapaciteteve ushtarake, ndihmën e inteligjencës dhe logjistikës, iniciativat diplomatike si dhe miratimin e sanksioneve shtesë ndaj Moskës. Drafti pritet të hidhet në votim gjatë konferencës.

Në Pallatin Elysee, krahas përfaqësuesve evropianë dhe amerikanë, morën pjesë edhe Steve Witkoff, i dërguari special i presidentit amerikan Donald Trump, si dhe dhëndri i tij Jared Kushner.

Presidenti ukrainas Volodymyr Zelensky mbërriti gjithashtu në Pallatin Presidencial, ku zhvilloi bisedime me liderët perëndimorë për formimin e një qëndrimi të përbashkët ukrainas, evropian dhe amerikan, me synimin për t’i dhënë fund luftës së Rusisë kundër Ukrainës.

/rtsh.al/