Senati Amerikan është kthyer në një fushëbetejë politike këtë të mërkurë, ndërsa Presidenti Donald Trump ka nisur një ofensivë të ashpër ndaj ligjvënësve të partisë së tij. Në qendër të debatit është një rezolutë që synon të kufizojë kompetencat e Presidentit për të ndërmarrë veprime të mëtejshme ushtarake kundër Venezuelës, pas operacionit ‘blic’ që çoi në kapjen e Nicolás Maduros.

Pesë senatorë republikanë thyen rreshtin javën e kaluar duke u bashkuar me demokratët për të avancuar rezolutën. Reagimi i Trump ishte i menjëhershëm dhe personal. Në një fjalim në Michigan, ai i etiketoi senatorët kundërshtarë si “katastrofa” dhe “humbës”, duke iu referuar specifikisht senatorëve Rand Paul, Lisa Murkowski dhe Susan Collins.

“Këtu kemi një nga sulmet më të suksesshme ndonjëherë dhe ata gjejnë një mënyrë për t’iu kundërvënë,” deklaroi Trump, duke mbrojtur operacionin ushtarak që solli Maduron para drejtësisë amerikane.

Tëheqja e senatorëve

Duket se presioni i Shtëpisë së Bardhë po jep efekt. Senatori Josh Hawley, i cili fillimisht mbështeti rezolutën, ka sinjalizuar tërheqjen. Pas një telefonate “shumë pozitive” me Sekretarin e Shtetit Marco Rubio, Hawley deklaroi se ka marrë garanci që nuk do të dërgohen trupa tokësore dhe se Kushtetuta do të respektohet. “Jam në modalitetin e dëgjimit,” tha Hawley, duke lënë të kuptohet se vota e tij mund të ndryshojë.

Kushtetuta vs. Presidentit

Demokratët, të udhëhequr nga Chuck Schumer, argumentojnë se Kongresi duhet të rifitojë autoritetin e tij kushtetues për shpalljen e luftës. Nga ana tjetër, administrata Trump përdor argumentin se kapja e Maduros ishte një operacion i zbatimit të ligjit (kundër trafikut të drogës) dhe jo një akt lufte, duke shfrytëzuar ligjet antiterrorizëm.

Edhe nëse Senati e miraton rezolutën, ajo ka pak gjasa të bëhet ligj pasi kërkon firmën e Trump, por votimi shihet si një test madhor besnikërie brenda Partisë Republikane në këtë vit zgjedhor.

/rtsh.al/