Duket se Lugina e Panjshirit nuk ka ndërmend të dorëzohet, për t’iu nënshtruar regjimit taleban. BBC shkruan se disa mijëra luftëtarë anti -talebanë raportohet se po luftojnë kundër militantëve në luginën e largët me një hyrje të ngushtë – pak më shumë se 48 kilometra nga kryeqyteti Kabul.

Nuk është hera e parë që Lugina Panjshir ka qenë një pikë ndezjeje në historinë e trazuar të Afganistanit, duke qenë një fortesë kundër forcave sovjetike në vitet 1980, ndërsa luftuan talebanët edhe në fillim të viteve 1990. Grupi që qëndron atje tani – Fronti Kombëtar i Rezistencës së Afganistanit (NRF) – kohët e fundit i kujtoi botës fuqinë e luginës.

“Ushtria e Kuqe [Sovjetikët], me fuqinë e saj, nuk ishte në gjendje të na mposhte … Dhe talebanët gjithashtu 25 vjet më parë … ata u përpoqën të merrnin luginën dhe dështuan, ata u përballën me një humbje dërrmuese,” tha për BBC Ali Nazary.