Episodi i shëmtuar në fund të ndeshjes mes PSG dhe Chelsea ka përfunduar në FIFA, e cila pret që të njihet me raportin e arbitrit kryesor për të vendosur se çfarë mase do të merret kundrejt Luis Enrike.

Trajneri spanjoll i PSG-së u pa në fund të ndeshjes duke kapur nga fyti brazilianin e Chelsea, Joao Pedro. Ky episod u inkuadrua edhe nga kamerat ç’ka ka bezdisur tej mase FIFA-n, e cila e konsideron si një incident që i cënon imazhin.

FIFA do të analizojë këtë episod dhe pasi të konsultohet me raportin e përpiluar nga kryesori i ndeshjes Alireza Faghani do të merret një vendim.

Deri më tani është kuptuar se Luis Enrike rrezikon një gjobë të majme dhe jo ndeshje pezullim siç u aludua orë pas incidentit. Fakti që incindeti ndodhi në një kompeticion, i cili do të mbahet një herë në katër vite, nuk pengon FIFA-n që të kërkojë ndeshje pezullim për Enriken, i cili do të rrezikonte që të ulej në tribunë për tre duele në Ligue 1 ose Champions League.