Nuk ka patur festë për tifozerinë vendase në jubileun e 75-të në pistën e Monzës, pasi kampioni në fuqi i botës, Maks Verstapen, ka siguruar fitoren e tij të 30-të në karrierë dhe të 5-tën radhazi këtë sezon, duke triumfuar në garën e Çmimit të Madh të Italisë dhe duke e thelluar kryesimin e tij në renditjen e përgjithshme të pilotëve në këtë Botëror të Formulës 1. Holandezi i “Red Bull”-it la prapa rivalin e tij, Sharl Lëklerk, ndërsa podiumin e plotësoi piloti i “Mercedes”-it Xhorxh Rasëll.

Në fakt, ajo që e ka kaluar e para vijën e finishit në garën e sjellë për sportdashësit drejtpërdrejt nga Rrjeti i Radio-Televizionit Shqiptar, ka qenë makina e sigurisë, pasi një avari në “MekLaren”-in e Daniel Riçiardos në 5 xhirot e fundit solli futjen e saj pistë dhe nën regjimin e saj është mbyllur edhe gara e 16-të e këtij sezoni.

Maks Verstapen u nis nga vendi i 7-të, duke fituar shpejt vende dhe ajo që bëri dallimin në këtë garë, përtej epërsive teknologjike të “Red Bull”-it, ishte edhe një herë tjetër strategjia e gabuar e ndalimeve për të ndërruar gomat, që e ndëshkoi sërish pilotin nga Montekarlo të “Ferrari”-t.

Në krahun tjetër, një garë e shkëlqyer për pilotin tjetër të skuadrës italiane, Karlos Sainzin, por edhe 7 herë “kampionin e botës”, Ljuis Hemilton, të cilët e nisën garën nga vendet e fundit, por e mbyllën atë përkatësisht në vendin e 4-t dhe të 5-të, duke u dhënë pikë të vyera skuadrave të tyre.

Maks Verstapen kryeson renditjen e përgjithshme të pilëtve me 335 pikë, 116 pikë më tepër sesa Sharl Lëklerk, i cili ka 219, ndërsa 9 pikë prapa është Serxhio Perez, kur vendin e 4-t e mban Xhorxh Rasëll, me 203 pikë, atë të 5-të Karlos Sainz me 187 dhe atë të 6-të Hemilton, me 168.