Konferenca e kryetarëve të grupeve parlamentare e drejtuar nga kryeparlamentarja, Lindita Nikolla, vendosi në mbledhjen e zhvilluar sot që debati për projektligjin “Për miratimin e marrëveshjes kuadër, ndërmjet Këshillit të Ministrave të Republikës së Shqipërisë dhe Eagle Hills Real Estate Development, Albanian Seaports Development Company, sh.a. dhe Nshmi Development L.L.C, në lidhje me projektin e investimit strategjik “Marina & jahtet e Durrësit”, të zhvillohet me datë 24 nëntor dhe të zgjasë 6 orë.

Pozita dhe opozita prej javësh janë përplasur, lidhur me këtë projekt- marrëveshje. Opozita pretendon se kjo është një aferë korruptive e qeverisë dhe kryeministrit Rama, ndërsa mazhoranca ka deklaruar se akuzat e opozitës synojnë të mbajnë larg investitorët strategjik, që duan të investojnë në Shqipëri.

Po sot mbledhja e kryetarëve vendosi që mocionit me debat për integrimin evropian, të zhvillohet me datë 17 nëntor dhe të zgjasë 4 orë. Mbledhja shqyrtoi dhe miratoi edhe kalendarin e punimeve të Kuvendit për periudhën 22 nëntor – 23 dhjetor 2022 dhe se zhvillimi i seancave plenare të bëhet në datat 24 nëntor, 5 dhjetor, 15 dhjetor dhe 22 dhjetor 2022.

/rtsh.al/