Qeveria e Mbretërisë së Bashkuar ka nisur një konsultim publik për të shqyrtuar mundësinë e ndalimit të përdorimit të mediave sociale nga personat nën moshën 16 vjeç, si pjesë e një pakete më të gjerë masash që synojnë kufizimin e përdorimit të telefonave celularë nga të rinjtë.

Konsultimi u njoftua nga sekretarja e Teknologjisë, Liz Kendall, në një kohë kur presioni publik dhe politik për rregulla më të rrepta ndaj platformave digjitale po rritet ndjeshëm.

“Përmes Aktit të Sigurisë Online, kjo qeveri ka ndërmarrë tashmë hapa konkretë për të krijuar një ambient online më të sigurt për fëmijët dhe të rinjtë. Megjithatë, këto masa nuk janë fundi i rrugës dhe ne e dimë se prindërit vazhdojnë të kenë shqetësime serioze. Për këtë arsye, jam e gatshme të ndërmarr hapa të mëtejshëm,” deklaroi Kendall.

Kryeministri Keir Starmer ka shprehur hapje ndaj idesë së një ndalimi të tillë, por sipas aleatëve të tij, ai preferon të presë rezultate dhe prova konkrete nga Australia, ku një ndalim i ngjashëm u miratua në dhjetor, përpara se të marrë një vendim përfundimtar.

Sipas qeverisë, konsultimi do të analizojë disa alternativa politike, ndërsa njëkohësisht pritet që çdo shkollë në vend të funksionojë, si parazgjedhje, pa përdorimin e telefonave celularë gjatë orarit mësimor.

/rtsh.al/