Grupi i Rithemelimit i ngritur me lëvizjen e ish-kryeministrit Sali Berisha zhvilloi këtë të diel zgjedhjet për kandidatët që do të paraqesë në zgjedhjet e pjesshme vendore më 6 mars. Pas orës 18:00 të kësaj të diele, komisionet bënë numërimin e fletëve që gjatë gjithë ditës u votuan nga anëtarët e partisë demokratike në 6 bashki.

Grupi i Rithemelimit do të përfaqësohet në Durrës me Ardian Mukan. Muka ka arritur të sigurojë 1546 vota, përballë 373 votave të kandidates tjetër, Silvja Gjepali.

Kandidati i Grupit të Rithemelimit në Shkodër për zgjedhjet e 6 marsit do të jetë Bardh Spahia. 

Ndërsa në Dibër, “primaret” brenda demokratëve i fitoi, Premtim Kryemadhi, i cili mori 424 vota duke u shpallur dhe kandidati fitues për të garuar në zgjedhjet e pjesshme vendore të 6 marsit.

Hekuran Xhani me 211 vota është shpallur fitues i “primareve” dhe do të jetë kandidati që Grupi  Rithemelimit do të kandidojë në garën për bashkinë e Rrogozhinës. Në Bashkinë e Vorës do të jetë Lulzim Vrana, kandidat i cili u shpall fitues i “primareve” me e 277 vota.

Në mbyllje të “primareve” që u zhvilluan këtë të diel , demokratët në Lushnje votuan për Elton Banon, i cili doli fitues përballë 3 kandidatëve të tjerë. /rtsh.al/