Ngjarja e rëndë e raportuar në Bulqizë një ditë më parë, ku fillimisht u dyshua se një 61-vjeçar kishte humbur jetën pas sulmit nga një ari, ka marrë një tjetër drejtim pas ekzaminimit mjekoligjor.

Viktima, Urim Fiku, dyshohet se është qëlluar me armë zjarri. Sipas ekspertizës mjekoligjore, në trupin e tij janë konstatuar plagë të shkaktuara nga armë zjarri në pjesën e kraharorit.

61-vjeçari kishte dalë në mal për të kullotur dhitë dhe, sipas të dhënave paraprake, ishte kthyer në banesë i plagosur.

Rasti ishte raportuar fillimisht në polici nga Spitali i Bulqizës, pasi familjarët kishin kërkuar ndihmë mjekësore për të, duke pretenduar se ishte sulmuar dhe kafshuar nga një kafshë e egër, dyshohet ari.

“Në vijim të informacionit paraprak të dhënë për ngjarjen e ndodhur në Bulqizë, ku shtetasi U. F., 61 vjeç, dyshohej se kishte humbur jetën si pasojë e sulmit nga një kafshë e egër (ari), bëjmë me dije se: Nga hetimet e kryera deri në këto momente nga grupi hetimor, nën drejtimin e Prokurorisë, dyshohet se 61-vjeçari përveç dëmtimeve të dyshuara se janë të shkaktuara nga kafsha e egër, është konstatuar një plagë e shkaktuar me armë zjarri. Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes dhe dokumentimin ligjor të saj”, thuhet në njoftimin e policisë.

Zbulimi i plagëve nga arma e zjarrit ka ndryshuar pistën e hetimit, ndërsa pritet që hetimet të zbardhin rrethanat e plota të ngjarjes dhe autorësinë e mundshme.

/rtsh.al/