Muzeu Metropolitan i Artit në New York ka anuluar ekspozitën e planifikuar në nder të stilistit britanik John Galliano, e cila ishte parashikuar të shfaqej në maj të vitit 2027 si eventi kryesor i Institutit të Kostumeve dhe të lançonte Met Gala-n vjetore.

Vendimi vjen pas valës së reagimeve të forta dhe zemërimit të shprehur në komunitetin hebraik dhe më gjerë, për shkak të deklaratave raciste dhe antisemite të bëra nga stilisti vite më parë.

Në një deklaratë të përbashkët të hënën, drejtori dhe CEO i muzeut, Max Hollein, njoftoi se pas diskutimeve të kujdesshme është rënë dakord që ekspozita të mos vazhdojë, duke shtuar se ajo do të zëvendësohet nga një shfaqje tjetër që do të bëhet publike më vonë.

Nga ana e tij, vetë Galliano u shpreh se ka vendosur me trishtim të tërhiqet përkohësisht nga ky projekt, duke përsëritur se mbetet plotësisht përgjegjës për dhimbjen e shkaktuar në të kaluarën ndaj komuniteteve hebraike dhe aziatike.

Prapavija e skandalit dhe reagimet institucionale

John Galliano, dikur një nga emrat më të fuqishëm të modës si drejtor krijues i Christian Dior, u shkarkua nga kjo shtëpi modë në vitet 2011–2012 pasi u shfaqën pamjet e komenteve të tij antisemitike në Paris, ngjarje që solli edhe dënimin e tij gjyqësor në Francë. Pas një periudhe të gjatë reflektimi dhe rehabilitimi, ai iu rikthye punës në vitin 2014 te Maison Margiela, ku drejtoi krijimtarinë për një dekadë.

Plani i Met-it për ta kthyer atë në qendër të vëmendjes përmes një ekspozite personale – një nder që u rezervohet rrallë stilistëve të gjallë – ngriti menjëherë tensionet. Pavarësisht bisedave paraprake që muzeu zhvilloi me udhëheqës të komunitetit hebraik për të shmangur pakënaqësitë, zemërimi publik vazhdoi të rritej.

Kryetarja e Këshillit të Qytetit të Nju Jorkut, Julie Menin, e cila kishte qenë ndër kritiket më të zëshme të kësaj nisme, e përshëndeti vendimin e sotëm. Ajo u shpreh se në një kohë kur antisemitizmi është në rritje, ndarja e një nderimi të tillë do të kishte shërbyer si një goditje e rëndë për komunitetin hebre, duke e quajtur anulimin e ekspozitës si hapin e duhur për të shmangur dhimbjen dhe dëmin e mëtejshëm.

/rtsh.al/